TVB小花游嘉欣，近日就成咗網民熱話。
除咗帶大家去美國睇波之外，仲因為佢原本係大家眼中嘅「慳妹」，但就忽然富貴。
話說家住屋邨、屋企冷氣機位空置、落雨會漏水、連Wi-Fi都冇裝、出門用紙袋代替手袋嘅游嘉欣，平時真係慳得就慳。
點知最近佢喺社交平台連環出po，曬出全身名牌：Hermès、LV、Miu Miu、CHANEL、Gucci輪住上身。
更掂水嘅係，佢仲戴住一條價值近10萬嘅Van Cleef & Arpels手鏈，全身打扮輕鬆六位數起跳。
另外又出入米芝蓮、飛美國睇世界盃、入住BLACKPINK Lisa同景色酒店等等，網民當然即刻封佢為「行走的廣東道」。
有個別好事網民仲喺留言區笑佢「突然富貴」，甚至暗示「比男人包咗」，但就批評佢穿搭品味差，話被其他小花比下去等等。
說話講得咁難聽，今次游嘉欣卒之都係忍唔住，罕有咁親自連環回覆留言。
佢話：「衣着打扮係我個人嘅選擇，中意想要有能力負擔咪買，唔一定吓吓都要關男人事嘅！」
之後佢又進一步解釋，話因為靚所以買，買咗就要著，著咗梗係影相，正常返工有收入都買得起，「人生唔止返工，仲要享受一下。」
至於以前唔開冷氣嘅舊事，佢都順便澄清：「開唔開冷氣係睇需唔需要，從來無關慳事。」
而對於被踩品味差，佢就大方咁話：「唔同類型嘅風格，我都鍾意嘗試，可能今次唔係你鍾意嘅類型，不過青菜蘿蔔各有所好。」
2000年出世嘅游嘉欣今次都回覆得大方得體，所以唔少網民都讚佢終於出聲反擊，而粉絲就力撐佢靠自己努力多年，有能力消費係正常事。
2018年入行嘅游嘉欣，喺TVB一眾小花當中都算入行比較耐，早年喺J2台《電競王》開始被年輕觀眾所認識。
之後喺《#後生仔傾吓偈》等年輕節目都有固定出鏡，形象可愛又親和。
2020年之後轉戰劇集，參演過《香港愛情故事》、《青春不要臉》、《你好，我的大夫》、《羅密歐與祝英台》等作品。
雖然多數都係小配角或者中型角色，但觀眾緣算係唔錯，2023年台慶頒獎禮仲攞到「最具潛質新人獎」，事業有一定發展。
不過早幾個月傳出TVB想集中管理藝人社交賬號，要求旗下藝人交出，但游嘉欣就因為拒絕交出而被公司雪藏一段時間。
雖然傳到好有「吉士」，但游嘉欣接受訪問時就支吾否認，話自己唔係好覺得有呢回事，純粹公司安排。
可能當時大台呢個要求引起全城譁然，之後似乎冇咗件事（除咗今年港姐候選佳麗各自開多一個官方帳號），而游嘉欣亦都繼續有唔少工作安排。
包括近期熱播嘅《非份之罪》，以及《夫妻的博弈》，佢都有份參與劇集宣傳，雪藏一事似乎已經解凍～
热门跟贴