原标题：行路过桥

前一排，广州大桥新桥开通，除咗车行之外，唔少街坊都上去步行下。同旧桥比，新桥有个非常抵赞嘅改变，就系行人道阔咗：从原来嘅1.75米，一下子变成咗4.5米。就算单车、行人喺一齐，都阔落好多。

我有个朋友，虽然屋企住河南，公司喺河北，不过佢返工都选择行路。点解？快，悭钱，唔塞车，兼且可健身。佢住喺滨江路，朝早行江湾桥到越秀，大约半个钟就到埗，有时俾公交车仲快。好似佢咁样，行路过桥、过江嘅街坊，估计亦唔少。呢几年，广州提出要建“慢行系统”，包括改善步行同骑车嘅道路环境。确实，对于一个拥挤嘅大城市，应该多倡导呢类环保嘅出行方式。所以，好似广州大桥新桥咁，留多啲路俾行人同单车，必定大受街坊欢迎。

广州中心城区，加阵跨珠江嘅，有大大小小十条左右嘅桥。2013年，海珠桥大修复通，接落来，洛溪桥亦将改造扩阔。真心希望，有关部门改造呢啲旧桥梁时，喺便利疏通车流嘅同时，亦多啲考虑下“慢行”嘅需求。国内有啲城市，甚至设置咗只允许行人嘅“步行桥”，譬如兰州，前几年就宣布古老嘅中山桥，禁止机动车通行，只俾行人过河。对广州来讲，设“步行桥”可能未必一下子做得到，但留多嘀心思喺环保出行上，相信亦会有所作为。

闻歌 媒体人