原标题：“边炉”定“甂炉”？

广州呢几日都几冻，好多人又开始打边炉嘞，咪住！究竟系叫“打边炉”定系叫“打甂炉”？

大家都知道，外地人讲嘅火锅，广府人一直有一种传统叫法——打边炉。呢个叫法同写法一直讲咗同埋写咗好多年，不过，早几年，就有人写过文章提出，打边炉嘅正确写法应该系“打甂炉”，因为古汉语词典上系“甂”，呢个“甂”字系指细瓦盆，旧时“打甂炉”系用细瓦盆装食材嘅。而“边”因为同音“甂”，所以慢慢就错写成“打边炉”。小弟就此求教过“度娘”，答复亦系“打甂炉”先至系正写。

但近日小弟睇过一啲资料发现，“打边炉”呢种写法，唔一定就系错嘅。

“边炉”呢个词组其实好早以前就有嘞，例如，喺明代广东籍大儒陈献章嘅《南归寄乡旧》中，就咁样写道：生酒鲟鱼会，边炉蚬子羹。可以睇出，“边炉”呢个词组至少喺明朝就有。“边炉”有炉放喺人嘅左右两边，或者人系围住个炉食嘢嘅意思。

所以，小弟认为，“打边炉”、“打甂炉”两种写法都可以，冇话边个写错，只系一个系指餐具，一个系指食态。

不过，话时话，虽然“打边（甂）炉”系广府人一种特有嘅传统叫法，但今时今日已经越嚟越少人咁叫嘞，宜家大家都系中意叫作“打火锅”多啲。

阿六 律师

(原标题：“边炉”定“甂炉”？)