31岁、伤员缠身、被球会放弃、无人有兴趣接收，曾经嘅天之骄子艾朗蓝斯（Aaron Ramsey），新季仲可以去边？

威尔斯王牌艾朗蓝斯，曾经系阿仙奴球迷宠儿，佢08年由卡迪夫城加盟，攀上事业高峰，19岁已经被云格认为系“识得进攻嘅坚尼”，前途无量，可惜2010年2月，发生咗著名嘅「梳尔哥斯事件」，艾朗蓝斯胫骨同腓骨骨折，复出无期，但喺6月，阿仙奴照样开出一纸长约畀蓝斯以示支持，够晒情义。

终于喺同年11月尾，艾朗蓝斯正式复出，但状态已大不如前，之后分别外借到森林及卡城，但当大家以为蓝斯就此玩完，呢位威尔斯王子就嚟个大翻身，重返阿仙奴后越踢越好，平均表现同实力，甚至更胜重伤前。

蓝斯在2013年更试过连续4个月当选球队MVP，之后成为阿仙奴两夺足总杯功臣，2019年以自由身加盟祖云达斯，周薪更加去到40万镑，成为史上最高人工嘅英国球员。

之后嘅故事大家都知喇，伤员频仍、喺祖记失宠，上季外借去格拉斯哥流浪更孭晒镬，喺欧霸决赛射失12码，格流亦无意留用，而祖记为咗悭人工，亦打算畀340万镑当赔偿金，提早同蓝斯解约。

世界杯喺年底就会开锣，蓝斯作为威尔斯王牌，需要尽快搵一间可以畀佢长期做正选嘅球会，去Keep住状态。据指暂时未有大球会对佢特别有兴趣。

《Mirror Football》分析指，5队波有机会成为蓝斯嘅下一家，分别系蓝斯出道嘅卡城、曾经短暂效力嘅森林、朗尼嘅华盛顿联队、急需中场嘅爱华顿，与及云尼斯达莱掌舵嘅PSV。